Pzit!...Entèndou encâ iquelle vou da temp passà

'quelle vou seréne e dousse ëd ma mamà,

que sounâve pla pchòtta via 'd ma bourdzâ

quant èrou abou lou gòssi m'amusâ...

Pzit!...

Aquelle vou dousse e belle, pléne d'armounìa

leissâvou lou-s-amics e a courìou via:

l'éro un piël duro duguée tournâ a misoun,

duguée itudiâ ou fâ caque coumiscioun

beq lou-s-amics s'amusâvon encâ

rablân pla pchotta via 'd ma bourdzâ!...

Ma pa bien 'd temp aprèe, mequé en moument,

èrou dzò tûrne alègre, dzò tûrne countent,

e, astà a la tàule, tranquile, ben dapé elle

a icoutâvou 'quelle vou seréne e bello...

Aloure que 'd tzosa bella eiq aprée, 'd tzosa que tou 'l mûnde durìa sabée:

crèire a Boun Dìu, estimà l'Italìa,

l'amûr per ël travâgliee la pouisìa,

tûtta qu'la tzosa bella da passà

qu'la dzent da dzûrne d'enquèu à isublià!..

Pzit!....

Oh, mi quelle vou, quelle vou a l'eltèndou encâ,

enquèu que mi scìu leugne 'd ma pchotte bourdzâ

e,cma alouro, mi a tûrnou ben countent

a ma misoun dûnt ma mamà m'attent,

pr'icoutâ 'ncâ qu'la simpla e bella tzosa

e per cuglî abou elle pancouta e rosa,

priâ 'l Boun Dìu e icrire uno pousìa ;
a qui be temp passà qu'i-s-anà via...