Fraire e amis nuésti,

   abou i primìo journ de primo ente tuchi i  gourjoun de la coumbo la néu grimo à grimo s'envai. Lou journ lou soulei viro aut ent al ciel, i viéi sàien d'i rua e, seta sus en mourret, i beiquen luén. Lou sero, quouro lou souléi se bàico s'i roche e i jal chànten lou dereìe bot, nousiauti s'arcampén à nosto meisoun e de luén nous arsounén d'en cant à l'aute de la coumbo, fin que i mourrét porten vìo nosto vous e partour calo lou silenci.

   Ma per mountàr ai nòste rua, passén denan de la guieséto e i'e dounén lou derrìe salut. Beiquén en moumént la bello façado, touto de peiro descuberto, qu'i n'a gaire parei. Propi uro i'a vint an que

i l'an facho, ma nous esméo sempre de mai lindo e armouniouso. Ent'aquele peire i'a l'estorio de nosto Sancto Lucìo ent'aquisti derrìe an. La gent d'iqui, lou preire d'aqui temp ilai i'an mura abou i soùe man, sacrifici sus sacrifici. Da alouro avén vist la gent escapasse, i meisoun e i meire fàsse deserte. Ma quouro tout esmiavo perdu, es neiçu lou nòste "Counboscuro", es neiçu lou ateìe de scoulturo, es neiçue la flammo de la nosto lengo patoisante e l'amour per lou passa e i tradicioun de nosto gent.

   E avén coumprés acò que la vòl dìr avér na guiéiso coumo la nostoo e sus la façado na dato: 1947. Vint an! - Aqueste peire, fraire patoisants, nous fan pensàr ai vòste belle guiéise, ai chouquìe viéi, glourioùs mounument de vòsto estorio. E nous sentén da pé de vous, fraire abou fraire. Perqué toute i choque de tuchi i chouquìe làuden lou Paire Segnour abou la lour priéro.